O le taamilosaga i Niu Sila ua ta’ua o le Kukkiwon Cup lea o le a auai atu ai le ‘au takwando a Samoa i le masina fou.
Faaalia e lē o loo faauluulu ai le taekwondo i Samoa, Tapunuu Leuluaitumua Kaino Thomsen-Fuataga tapenaga o loo faia a o loma ai lenei faamoemoe.
“E toa 16 le ‘au atoa, fitu tamaitai ma le toaiva o alii ua filifilia e faimalaga atu i Niu Sila.
“O le taamilosaga faavaomalo muamua lea a le taekwando Samoa talu ona tatala femalagaa’iga ae sa faatino pea ana taamilosaga masani i totonu lava o Samoa.
“Ia matou tapenaga e faafā pe faalima foi ona toleni le ‘au faatasi ai ma le lagolagosua o ana faiaoga i taumafaiga lava ia faatupulaia pea le malosi o sui taaalo.”
O le taekwando o se tasi lenei o taaloga o loo i lalo o le lisi o taaloga a le Pasefika lea o le a faia i Solomona ma na faailoa ai o loo agai pea i luma le faalauiloaina i le atunuu.
“Na tau tulaga faaletonu lava i nisi o taimi le taumafaiga o le taaloga ae peitai o le tausaga e 2019 na vaaia ai le toe ola mai o le taaloga e ala i le fiafiaga o fanau e mananao e ilona ona faatinoina.
“O le auala foi o loo faalauiloa ai le taaloga o le oo lava o ana polokalame i aoga ae le gata i lea o taamilosaga o loo faia e le gata i Samoa nei ae o atunuu mamao.
“Mo ē o fia iloa le faatinoina o lenei taaloga e tatala le avanoa e afifio mai ai i le nofoaga o loo faatautaia ai toleniga a le taekwando i Matautu e silasila iai.”
