O le faailoa lautele ai e le ta’ita’i o le vaega faaupufai e puipuia aiātatau a tagata o le fuafuaga e toe ave se talosaga e iloilo ai le faai’uga a le Faamasinoga Maualuga poo se apili, faasaga i le i’uga a le Faamasinoga Maualuga ua talia ma aloa’ia ai le palota a le Fofoga Fetalai na pasia ai i le lua vae tolu teuteuga o le faavae 2025, e lē taofia ai galuega ua faagasolo a le Faamasinoga o Fanua ma Suafa.
Ua faailoa lea tulaga e le Lesitala o Faamasinoga o ia foi o le Ofisa Sili o le Matāgaluega o Faamasinoga ma le Faafoeina o Matāupu Tau Faamasinoga, le susuga Papalii John Taimalelagi Afelē ina ua fesiligia mo sona finagalo.
O se tasi o matāupu na fesiligia ai le susuga Papalii o le laumanu’ia ai o suafa o ni Faamasino sinia o le Faamasinoga o Fanua ma Suafa ua sauni e tauva i le isi palota tele a le atunuu, lea e to’atasi ua mae’a ona momoli i le pati faaupufai o le a tauva ai, ae o le isi ua faaalia e se molimau e lē o toe mamao ae momoli foi i le vaega faaupufai o le a tauva ai.
O le feiloa’iga i le vaiaso na te’a nei a le ta’ita’i o le vaega faaupufai e puipuia aiātatau a tagata ma tusitala na faaalia ai e le susuga Tuilaepa L Sailele Malielegaoi, e tatau i tagata faigaluega a le malo e fia tauva ona faamavae ma galuega ae lē o le faaauau pea o le tautua ma faaaogā ai meatotino a le malo e pei o taavale.
Le Ofisa Sili o le Matāgaluega o Faamasinoga ma le Faafoeina o Matāupu Tau Faamasinoga, le susuga Papalii John Taimalelagi Afelē.
