O le masina na tea nei na faasalalauina ai e le alii fusu lauiloa a Samoa, Ato Plodzicki Faoagali i luga o upega tafailagi le lona lua ai o ana fusuaga faapolofesa e faia i Samoa nei.
O le alii fusu mai Fiti, o Bulley Senidokoo lea ole a fetaui ai ma Faoagali i le aso 23 o le masina fou.
Na ta’ua e Faoagali o lana paga o le a feiloai o se tagata malosi.
“E malosi lava le alii lenei ma ou te iloa e faigata lava ona maua a’u e le alii lea i se tulimanu auā e le o tuumāmāina foi i aga ma taga ia ou te nofo ma au.”
E tolu kamupani e aofia ai le faletalimalo a le Tanoa, Marist St Joseph Sports Club ma le Wheels for Rent at Dannys lea o loo lagolago malosi i lenei alo o Samoa ma ana taumafaiga aemaise lava i le fusuaga o loma nei.
Na ia saunoa ai e moomia lava le tele o nisi kamupani e lagolagoina o ia.
“E moomia lava le tele o nisi e fesoasoani mai afai o iai nisi e fia lagolagoina lo’u nei tagata faafesootai mai a’u i luga le FB.”
O le faafitauli tele lava i le taimi nei o lea e faigaluega fulltime Faoagali ma e taumafai lava ia ofi la’u schedule o a’u toleniga i aso uma.
“E faalua ona ou koleni i le aso ona ou sauni lea i po ou te alu ou te faigaluega, o la’u lava lea schedule i aso uma.
“O le ala lea o le tau sailia ai o ni sponsors se tele e lagolagoina lenei faamoemoe.”
O Faoagali o loo fuafua e auai i toleniga i le 2 vaiaso a o lei faia lana fusuaga faapolofesa lenei e sailia ai se aufusu a Samoa mo taaloga a le Pasefika e faia i Solomona.
“Ou te auai i toleniga nei ona o le naunautaiga lava ia mafai ona tauaveina le tagavai a le atunuu i taaloga a le Pasefika ia Novema o le tausaga nei.”
