Ua faamautinoa mai e le Palemia Chris Hipkins o lea o le a ia taitaia le aumalaga i Saina i le faaiuga o le masina nei.

O le mae’a ai o le fono a le Kapeneta ananafi na faailoa mai ai loa e Hipkins, ma afai ae taunuu faatoa toe alu lea o se faigamalaga faapea talu mai le Koviti.

O le aumalaga o le a o ai foi ma sui mai le vaega o turisi ma aoga faapea ai le itu o pisinisi.

Fai mai le Palemia o le a ia asia Beijing, Tianjin ma Shanghai ma ua faamatalaina foi faigafaapaaga a Niu Sila ma Saina, o se faigauo e tele itu lelei ae e faigata foi.

O Saina o le maketi tele lea o loo alu iai oloa faatau atu i fafo a Niu Sila e pei ona faamauina ai le $21 piliona e oo mai i le masina o Tesema i totonu o le 12 masina, e tusa lea e lata i le tasi kuata o le tuufaatasiga o tupe maua mai fefaatauaiga faavaomalo.