Ua faailoa e le Minisita o le Matagaluega o Puana’oa Faalenatura ma Siosiomaga i lana tali i mataupu lautele agai i le tala autu o le tupe, o loo soalaupule nei e le Palemene, e le o lesitalaina ni fanua faaleaganuu i le tulafono o le LTRA 2008 ae o se tulafono o loo lesitala ai na o fanua umia saoloto.
Ua faamanino e le Minisita le afioga Toeolesulusulu Cedric Schuster lea tulaga sa lāgā i ni finagalo o sui faipule ia latou saunoaga faalauaitele o le tala o le tupe.
Peitai ua faailoa e le minisita, o fanua o loo totogi ai seleni i le faalapotopotoga o eleele le Samoa Land Corporation ma le faamoemoe e lesitala o ni eleele faaleaganuu e le o mafai ona faia sea tulaga e tusa o aiaiga faaletulafono o le lesitalaina o fanua.
Ua faaalia e le Minisita o eleele o loo faatau e ala i le totogi o tupe o eleele umia saoloto, ae talu ai o le fesiligia o fanua o loo totogi i le SLC i le faamoemoe e avea ma fanua faaleaganuu, o loo galulue faatasi nei le faalapotopotoga o eleele a Samoa ma le Matagaluega o Puna’oa Faalenatura ma Siosiomaga mo le sailia o se faiga e taoto lelei ai lea tulaga.
Le Minisita o le Matagaluega o Puna’oa Faalenatura ma Siosiomaga, afioga Toeolesulusulu Cedric Schuster.
