Ua iai se fuafuaga a le Federal Government poo le faigamalo a le Feterale e faia se ID se tasi o le tagata Digital ID e mafai ona tuuina uma iai ona faamaumauga faalilolilo ma faaitiitia ai le soona avanoa o faamatalaga patino e silasila fua iai isi tagata.
O le masina o Oketopa 2022 na osofaia ai i upega tafailagi le auaunaga a le Medibank ma sa oo ai i se tulaga lamatia faamaumauga o le silia i le 9.7 miliona o tagata Ausetalia.
E lē gata i lea ae o le osofaiga foi o le kamupani fai telefoni a le Optus.
Na ta’ua i lipoti a le 9News o le Federal Govt o le latou tali la lea i le faafitauli e pei ona alia’e i le tuanai ma ua manatu ai o le a faia sea fuafuaga o le Digital ID e tuu uma ai faamaumauga o le tagata lava ia e pei o faamaumauga o lona tusifolau, laisene avetaavale, lafoga, lipoti o le soifua maloloina, o pili totogi, teugatupe.
Saunoa le Komesina o mataupu faalilolilo a Ausetalia le Privacy Commissioner, o le Digital ID lea o le a faapei o se faleoloa tele e tasi e faatau iai tagata e faamaonia ai i latou.
