Ua faaauau pea ona taofia i le vaaiga a leoleo Pokati Tu’u poo Pokati Faataui 58 tausaga le matua o Fasitoo uta, se’i faamautu moliaga a leoleo i totonu o le isi lua vaiaso.
O le amataga o le vaiaso nei na tula’i ai mo le taimi muamua Pokati o loo molia i lona faaoo o le maliu i se tamā o le nuu o Nofoalii faapea le leoleo satini o Peniamina Perite.
O le Aso Lua o le vaiaso nei na faia ai toe sauniga ma lagomau le Malu o le Malo i lona aiga i Faletagaloa Safune i Savaii.
O le auai atu o le Fofoga Fetalai o le Palemene i toe sauniga o le malu o le Malo faapea nisi o sui Faipule ma ta’ita’i o le Malo na lē faataunuuina ai le fono usu i le Aso Lua ae faato’ā toe faaauau i le Aso Lulu o le vaiaso nei.
O le masina fou o Setema o le a toe valaau ai moliaga o Pokati Tu’u, lea o le a faamautu ai moliaga uma a leoleo ma e tatau ona oo atu i le valaauga o sosoo ai, ua faamautu se loia e tula’i mo Pokati.
