O loo taofia pea le taitai o le Destiny Church ile nofoaga o le falepuipui I Mt Eden ma o lipoti lata mai I le aso ua taua ai ua tuuina ia te ia ana aitema mo le tausia o le soifua maloloina ma ua taua ile lipoti ua faia lea tulaga ile maea o le vaaia o tagata e lagolagoina o ia o solo tetee I fafo ane o le falepuipui ona o ni faamatalaga e faapea sa taofia le tuuina atu o ia aitema personal hygiene items ia te ia.

O le aso 27 o le masina nei lea o loo taua faatoa mafai ai ona tatala I tuaina ua le manuia le talosaga e tatala ai I tua I le amataga o le vaiaso nei. E le nao le tasi se moliaga o loo feagai ma Tamaki e faatatau I le Poloaiga mo le puipuiga lautele mai le Koviti 19 le Covid 19 Protection Public Health Order ma le solia o aiaiga o lona tatala ai I tua.

O I latou e lagolagoina o ia na agai ane ile falepuipui ile aso na pueina ai o ia ma nonofo ai lava I fafo ane o lea nofoaga. O loo faailo ai lo latou tetee ile tulaga ua tulai mai ma ua taua I nisi lipoti o a latou solo tetee ua poloka ai ma taavale e agai atu ma agai mai I fafo mai le falepuipui

Ise pepa o faamatalaga na tuuina ane e le matagaluega o faasaoga I le Newshub ua faailoa ai o tagata uma o loo taofia I le falepuipui o loo tuuina iai taumafa I aso taitasi, lavalava ma tulaga uma mo lo latou saogalemu, soifua maloloina ma le nofo lelei ae latou te faaaloalogia foi le aia tatau a le tagata e faia ai solo tetee ae ao foi ona silasila i tuaoi ma ni aafiaga I nisi tagata.