Tusia : Maina Vai
Ua faasaina nei mo le 6 masina ona toe faaulufale mai le sipili o le Ethanol i le atunuu. O le tusi ua maea tuuina atu e le Afioga i le Sui Palemia o ia foi o le Minisita o Tupe Maua a’o le taitaifono fo’i komiti e pulea le ava malosi i le atunuu ia Hon Tuala Tevaga Iosefo Ponifasio i pisinisi gaosi ava malosi i le atunuu o loo faailoa ai lea tulaga.
O le faasaina ona toe faaulufale mai o le sipili ua taua o le ‘ethyl alcohol'(Ethanol) e amata atu lea a taeao aso 7 o Mati seia o’o i le aso 7 o Setema 2022.O loo taua ile tusi a le Minisita le faaiuga lenei na tasi iai le fonotaga mulimuli a le Komiti o Ava Malosi sa faia lea i le aso 17 o le masina ua tuana’i.O mafuaaga o lea faaiuga o loo taua na maua mai lea ina ua maea ona agai le komiti e talanoaina le tele o mau ripoti na tuuina atu o loo faaalia ai le faatupulaia o le tele o faalavelave i sauaga, ma faalavelave ua maumau ai le soifua, o loo taua ai le maualuga o le faaogaina o le ava malosi o loo gaosia mai i le sipili lenei.
O nisi o nei popolega o loo faatulai atu foi e tagata lautele e aofia ai ma Ofisa Faasalalau, ma le Faamasinoga. O le ala lea na agai ai loa le komiti ia faia se suesuega e ala i lea mataupu.O le sa ua faatulai nei e aofia ai le taofia ona toe faaulufale mai o lea sipili i le atunuu i se taimi ua faatulagaina mai. O pisinisi uma ua faapena ona maea faia a latou oka ma ua maea uta i vaa mo le auina mai i Samoa e tusa ai ma le aso o le tusi a le minisita o le a tatala pea ona auina mai, peitai o le a fitoitonu lava ma suesuega atili i lenei mataupu, ma e tatau ai i ia pisinisi ona faailoa mai i le komiti faamaoniga o a latou uta ua maea faia.
Ua faamanino fo’i o lenei sipili ma lona faaogaina e fuafua mo le faamamaaga (cleaning) ma o loo fuafua tatau e le Matagaluega o le Soifua Maloloina faapea le ofisa suesue o Samoa le SROS le fua maualalo o loo faaulufale mai ai lea sipili i le atunuu mo le faamamaina o mea ma isi tulaga e talafeagai ai, o le a le afaina la ia tulaga i le sa lea ua faatulai mai e le Komiti.Saunoa foi le Mnisita o le sa lenei o le a mafai ai ona agavaa foi le komiti e suesue atili i le mataupu lenei mo le agai i luma ina ia mautinoa e saogalemu le atunuu.
Na faaalia ua maua foi i uluai suesuega o lenei mataupu fautuaga e faatatau lava i le maua ai lea o le fua e sili atu i lo le tulaga talafeagai o le sipili lenei i totonu o ava malosi o loo gaosia ma faatauina atu i lo tatou atunuu. O le a oo atu foi le suesuega i le tulaga e faalautele atu ai mo le aofia ai o le faaulufaleina mai, o i latou o loo auina mai ai, ma e o gaosia i totonu o Samoa aemaise ai o le tulaga i tulafono ma faigafaavae o loo lima taitaiina ai lea foi mataupu i le atunuu.
Ua tuuina mai foi e le komiti le avanoa i soo se tagata lava e fia tuuina atu sona finagalo i lenei mataupu e mafai ona faaoo atu i le komiti i totonu o le fitu aso talu ona tuuina atu le tusi taofi a le Minisita.
