E tolu tausaga o le a taofia ai le toe faatauina i tua o manu papalagi poo povi mai lafumanu uma a le Malo, ae tasi le tausaga o le a lē toe faatauina ai foi i tua ni meaituaolō poo puaa ma mamoe.
O nofoaga o loo iai lafumanu a le malo o Vaea, Togitogiga, Lemafa ma Tanumalala.
Ua faailoa e le Matāgaluega o Faatoaga ma Faigafaiva, o le masina o Me o le tausaga nei e amata ai lea fuafuaga i le mafua’aga e pei o le toe fetuuna’i ma toe faatulaga ālafua fou mo le toe faaleleia o atina’e tau lafumanu a le Malo i le naunauta’iga e tatau ona ave iai le faamuamua.
Ua fuafua e faaaogāina metotia faatekonolosi mo le faafeusua’iina o manu, faaulufale mai o ituaiga fou o manu mai atunuu mamao aemaise i nisi o ituaiga o manu papalagi e silisili ona lelei ma mautinoa le ola mālōlōina i le tau i Samoa.
Ua fuafua ai foi se polokalame faaleleia o mea’ai ma falegaosi mea’ai mo manu ma le polokalame faaleleia o vao fou talafeagai mo manu.
Na faaalia e le matāgaluega o se tasi lea o lu’itau ua feagai nei ma lana auaunaga ma ua ao ai ona faia ni suiga lelei ina ia mafai ona tali atu i faafitauli o feagai nei, o le lē lava o manu auā atina’e a le mamalu o le ‘au fai lafumanu.
Ua toe talosaga ai le matāgaluega ia lava papale a o toe tapena e faatino lana pitolaau e pei ona fuafua ma faataoto i le taimi nei.
