Ua faatonuina e le afioga i le tamaitai faamasino o le Pule o Maliu poo le coroner, le afioga Alalatoa Rosella Papalii, le faia o se taotoga faapitoa e faamautu ai le mafuaaga o le maliu o le alii pagota o Kolani Jnr Lam, ma faatonuina ai foi le taofia o le toe faatauina o ni vailaau oona ma faaulufale i nofoaga o loo tuli ai faasalaga poo falepuipui i totonu o le atunuu.
O lea finagalo o le pule o maliu o loo faaalia i lana tusi ua tuuina atu i le Komesina o leoleo, falepuipui ma le ola toe fuataina, ma faaleo ai ona atugaluga i le iai o le faatamala o i latou o pulea ma vaaia le falepuipui i Tanumalala i le vaaia lelei o pagota o loo galulue i faatoaga i tua mai o le lotoa o le falepuipui, ona o le lē lelei o le vaaiga.
O ia faaletonu ua faaalia e Alalatoa Rosella Papalii, e matua tatau ai ona suesueina lelei e se itutino tumaoti.
O nisi o vaega ua lāgā e le pule o maliu ua iai lana fautuaga e tuuina atu mo nisi suesuega atili a le ofisa o le Komesina o Sulufaiga.
O le aso 12 o Iulai ua faatulaga e valaau ai molimau mo le suesueina o le mafuaaga o le maliu lilo poo le inquest.
O le Aso Lua o le vaiaso na tea nei na faanatinati atu ai le pagota ua maliu i le falemai i Leulumoega tuai ina ua masalomia ua ia inu le vailaau oona fanavao o le paraquat.
Na ave i le falemai i Motootua ma maliu ai i le Aso Lulu na sosoo ai le aso 8 o Fepuari.
Ua ave faamaisega a le pule o maliu i aiga ma alo o lē ua maliu, ae ua tālia nei le aso e taunuu ai le fomai mai Fiti mo le faia o le taotoga faapitoa.
