Ua faaulu atu se lafo e le sui tauva o le HRPP mo Falealupo lea na faaleaogaina lona agavaa e tauva ai i le palota laititi mo se iloiloga faaletulafono (Judicial review) i le faaiuga lea na tuuina atu le Faamasino Sili ma le Tamaitai Faamasino i le amataga o le vaiaso nei.
O lea faaiuga na faaleaogaina ai le tauva o Tuitogamanaia Dr Peniamina Leavai i le faigapalota laititi o loo loma nei a lea itumalo ona o se lu’i a le sui tauva a le Faatuatua i le Atua Samoa ua Tasi ia Fuiono Tenina Crichton e faapea e lē agavaa Tuitogamanaia e tauva i lea faigapalota ona e le’i ausia aiaiga o monotaga faalelotu.
O le faaiuga a le faamasinoga e faapea e le’i faia ni monotaga faalelotu a Tuitogamanaia i oe Ekalesia EFKS i Vaotupua i Falealupo o taua saga e tolu.
“We find that Tuitogamanaia Peniamina Leavai has not rendered religious monotaga to EFKS church at Vaotupua Falealupo Tai for three consecutive years before the lodgement date pursuant to section 8 (1)(d) and section (5) of EA 2019”.
O le loia o loo tulai mo Tuitogamanaia le afioga ia Aeau Leota Tima Leavai ma faamaonia lea lafo mo se iloiloga faa faamasinoga lea na tuuina atu i le Aso 23 o Novema ina ia iloilo ina i se taimi faanatinati (Pickwick basis) ae le’i amatalia le faiga palota i le Aso Faraile nei. Taua e Aeau o loo o latou saili se fesoasoani faa faamasinoga ina ia toe faatumauina le agavaa o Tuitogamanaia e tauva ai i le faigapalota.
Ua faamaonia mai e se molimau faamoemoeina a le Radio Samoa o le itula e 10 a taeao o le a fofogaina ai loa lea mataupu i luma o le faamasinoga
