Ua talosaga le alii o Talalelei Pauga ina ia faasee ese le Tamaitai Sui Faamasino Sili ia Niava Mata Tuatagaloa mai le iloiloga o lana mataupu i le faamasinoga.

O le mafuaaga e pei ona ta’ua e lana loia le tamaitai o Josephine Sapolu o aafiaga o le Tamaitai Faamasino ona o ia sa ia iloiloina mataupu faasaga ia i latou e toatolu ia ua falepuipui ona o le mataupu lava lenei lea e aafia ai ma Talalelei Pauga.

O Pauga o loo molia i le taupulepulega e tagatavaleina lē sa avea ma Palemia o Samoa, Susuga Tuilaepa Sailele Malielegaoi.

O ia e toafā iai i latou na faia lea tulaga ma ua tuli nei faasalaga o le isi toatolu i le Falepuipui.

O ananafi na tulai ai lea alii i luma o le alii faamasino sinia ia Vui Clarence Nelson i nisi o talosaga a lea alii ua faila atu i le faamasinoga.

Na saunoa Vui mai faamasino uma o le Faamasinoga, ua na o le Tamaitai Faamasino ia Mata Tuatagaloa e mafai ona ia iloiloina lenei mataupu ma afai ae talia e le Tamaitai Faamasino lenei talosaga lona uiga o le a tolo ai le iloiloga o lenei mataupu mo se taimi umi.

Na ta’ua foi e le alii faamasino o lona uiga o le a tilotilo i se taimi poo le faaiuga o le tausaga lea e oo mai ai faamasino mai fafo latou te iloiloina talosaga apili ma iloilo ai lea mataupu.

Na faailoa e le tamaitai loia o tulai mo Pauga ua tapena uma la latou itu i lea tulaga ma afai ae talia le faasee ese o le tamaitai faamasino o le a tuuina atu loa se talosaga mo se faamasino mai fafo na te iloiloina le mataupu a Pauga.