Ua finau nei le itu a leoleo o loo finauina le moliaga faasolitulafono o se tamalii sa avea ma leoleo o le Malo le susuga Paepaetele Junior Betham, e fia tuuina atu se isi o a latou molimau o se ata video o le polokalame o le Lauao Sinasina a le faletelevise o le EFKS, e lagolago ai tuua’iga taufaaleaga a lē ua molia, faasaga ia Nafoitoa Talaimanu Keti, o lē sa avea ma sui fofoga fetalai ae o se se tasi o Komesina lagolago o le matagaluega o leoleo i tausaga ua tuanai a o lei avea ma faipule o le Palemene.
O loo teena e loia a Paepaetele Junior le faaaogā o lea ata video i le latou finauga, ua tuanai ni aso o faagasolo suesuega o le moliaga ae o lea faato’ā avatu lea mau a leoleo, ma e lē talafeagai ma tulafono ta’iala a le faamasinoga i le faagasologa o le suesueina o molimau. O loo finau le loia a leoleo e talafeagai ona o se mau e faamaonia ai tala ma upu na faaaogā e lē ua molia i le polokalame a le faletelevise na faia ai tuua’iga o se gaioiga a lē sa avea ma sui fofoga fetalai a o avea ma leoleo, na taumafai ai e faamalosi se tamaitai leoleo.
O le finauga a loia a itu e lua i le talia ma le teena o le ata video o le a aumai iai se faai’uga i le aso lenei, Aso Faraile, 8 Iulai, ma iloa ai le faaauau o suesuega i le moliaga o le taufaaleaga. O le masina o Mati na amata ai ona valaau molimau o le faamasinoga, ae na tolopo ona sa malaga i fafo le loia a le itu a leoleo.
