Ua talosagaina e le Malo o Samoa, e ala i le Ofisa o le Palemia, se faamatalaga aloa’ia mai le Ofisa o le Loia Sili a le Atu Solomona e tusa ai o tulaga ma faai’uga na mafua ai le poloa’iga ina ia taofia le afioga Leiataualesa Jerry Brunt i le malaga ese mai Honiara.

Ua faatulaga e le Ofisa o le Palemia se fesoasoani ina ia faamautinoa ai le avanoa o se lagolagosua faaletulafono mo Leiataualesa, a o faatali ai se faamatalaga aloa’ia mai Honiara.

O le sauni ai o le afioga ia Leiataualesa e toe taliu i Samoa ina ua mae‘a le tauvaga mo le sa’ilia o se Tausala o le Pasefika, le Miss Pacific Pageant, lea sa avea ai o ia o se tasi o faamasino e to‘alima o lea tauvaga, ae taofia ai o ia i le malaevaalele i Honiara.

O le a toe faailoa mai nisi faamatalaga e le Ofisa o le Palemia, pe a maua nisi faamatalaga aloaia mai le Atu Solomona.

O le mataupu lenei o loo masalomia e iai le sootaga atu i feteena’iga o manatu talu mai le iuga o le tauvaga na sa’ilia ai se Tausala o le Pasefika poo le Miss Pacific Islands lea na faataunuuina i le atunuu o Solomona i le afiafi o le Aso Toonai talu ai, lea ua manumalo ai le Miss Samoa, le tamaitai lalelei o Litara Loma Leilani Ieremia-Allan.

O le faai’uga aloa’ia o lea tauvaga, ua manumalo le Miss Samoa, tulaga lua le Miss Tonga, tulaga tolu le Miss American Samoa, ma le tulaga fā o le Miss Solomon Island.

O se tauvaga sa matagofie uma tapenaga a tamaitai tauvā, peitai e malama ane le taeao o le aso na sosoo ai, le Aso Sa, ae amata loa ona tumu luga i le social media i lafoga ma tuua’iga ogaoga na amatamea mai ai le au tapua’i a Tonga aemaise se tasi o faamasino o le tauvaga o se tamaitai Tonga.

Na ia tuua’ia le susuga i le alii faamasino o ia foi sa faauluulu iai le laulau o faamasino e to’alima, le Afioga Leiataualesa Jerry Brunt, e faapea na ia sasae le pepa sa iai le faasologa sa’o o tulaga o tamaitai tauvā, ae ua ia toe tuis se isi pepa ina ia manumalo ai le Miss Samoa, semanū o le Miss Tonga sa tatau ona manumalo i lea afiafi, e tusa ai lea ma manatu o le tamaitai na amataina nei mau tuua’iga.

O tuua’iga nei sa matuā lagalagā ai finagalo o tagata tapuai ma lagolago a tamaitai sa faasino iai lenei mataupu; ma e tele ni faamatalaga matagā, o lafoga lē mafaufau ua soona lalafo i luga o upega tafa’ilagi ma fesoota’iga televavave le Facebook.

Peitai i le tali mai iai a le tamaitai sa avea o se tasi o i la’ua na va’ili’ilia ma faaopoopo ma faitau uma togi mai faamasino ta’ito’atasi e tusa ai ma vaega eseese o le tauvaga, na ta’ua ai e le scrutineer o le tauvaga, o ia foi o le CEO o le Institute of the Solomon Islands Accountant (ISIA), o Pamela Naesol, i se tusitusiga a le In-depth Solomon, e na te faaseseina ai ma faamautinoa mai le leai o se moni o nei uma faamatalaga sese ma tuua’iga matagā ua salalau solo i luga o upega tafa’ilagi e faasagatau atu i le alii Samoa sa avea ma faamasino ulu, Leiataualesa Jerry Brunt.

Na ta’ua e Pamela Naesol, e matuā sese lava foi tuua’iga faapea na saei e Leiataua le pepa sa iai i’uga o le tauvaga, ae ia avatu se isi pepa e ese mai i MCs poo i la’ua na faafoeina lea po.

Na ia faasa’o mai se isi foi faamatalaga poo se tuua’iga sese e faapea na tusia e le ‘au faaopoopo togi poo scrutineers togi mo tamaitai tauvā i luga o se pepa.

Fai mai Pamela, “E lē sa’o lena faamatalaga, auā sa matou faaaogāina se ituaiga o polokalame e ta’ua o le pepa galue poo le spreadsheet, lea e otomeki lava ona faatulaga ai le aofa’iga o togi pe a matou tā iai i totonu faamaumauga o togi o tamaitai tauvā.”

Na ta’ua e Pamela, sa latou mulimulita’ia lava faiga tonu sa faatino ai le filifilia o le Miss Samoa e avea ma Miss Pacific Islands ma sa sologa lelei ma faaaogā auala talafeagai.

Sa lelei lava le faasologa o mea uma se’ia oo i le vaega o faatalanoaga (interview), lea na tutusa ai togi o le Miss Samoa ma le Miss Tonga.

Na ia ta’ua i le In-depth Solomon, o le tulafono lava o tauvaga e mansion, afai e tutusa togi o ni tamaitai tauvā, e tatau loa ona logoina le faamasino o loo taiulu (head judge), ma e na o ia lena e mafai ona faia le palota faai’u.

Na faamaonia mai e Pamela, sa palota Leiataua mo le Miss Samoa ma maua ai loa e Samoa togi e 3 (3 points) ae 2 points mo le Miss Tonga. 

Sa tuufaatasia e scrutineers nei taunuuga i totonu o teutusi e lua, e tusa ai ma vaega o le tauvaga, o le teutusi sa iai i’uga o faailoga faapitoa poo Special Awards, ma le isi teutusi sa iai i’uga o faailoga autū poo Main Awards.

Na faamaonia mai foi e Pamela, o ia lava na avatua nei teutusi i MCs o le afiafi, ma na ia ta’ua i le In-depth Solomon, e leai lava se faiga na faaletonu pe na faatogafitia ai le taunuuga o le tauvaga i lea po o le Aso Toonai talu ai.

Fai mai le faamatalaga a Pamela, “afai e iai se isi e mafai ona faia ni suiga i le lisi o togi, o ma’ua scrutineers auā e na o ma’ua sa mafai ona vaai i togi uma ma taunuuga faai’u, peitai e le’i iai se mea faapena na tupu.”

I lena lava faatalanoaga a Pamela ma le In-depth Solomon, na ia ta’ua ai, o se tasi o tamaitai faamasino o se Tonga, na ia alu atu ma fesili pe aisea ua manumalo ai Samoa ona i lona talitonuga, e to’atolu faamasino na palota mo le Miss Tonga ae na o le to’alua mo le Miss Samoa.

Na fautuaina e Pamela lea tamaitai faamasino mai Tonga, afai o iai sana faaseā, e tatau ona ia faailoa atu lena faaseā i le komiti o le Miss Pacific Islands Pageant (MPIP).

E iai le talitonuga o Pamela o se ata video na pu’eina ai e se tasi le taimi lea na felafoa’i ai la upu ma le tamaitai faamasino mai Tonga, ma atonu o iinā lea na amata ai ona faauiga sese e tagata lea vaaiga ma avea ma mafua’aga o tuua’iga ua faia faasaga i le faamasino sa taiulu.

Teena uma e Leiataua Tuua’iga Faasaga ia te ia

I se faatalanoaga a le Afioga Leiataua ma le In-depth Solomon, na ia teena uma ai tuua’iga ua faia faapea sa ia faalavelave i le taunuuga o le tauvaga.

O Leiataua o si alii loia, ma o se tasi o faipisinisi i Samoa, ma na ia tatua, e lē fou ia te ia nei ituaiga o tauvaga aua e tele foi taimi sa ia faafoeina ai tauvaga faapea i totonu o Samoa ma isi atunuu, ma e telē lona faaaloalogia o le faafoeina o nei ituaiga o tauvaga.

Saunoa Leiataua, “Ou te faaaloalo tele i tauvaga matagofie nei a le Pasefika, ma ua ou matuā lagona ai le faanoanoa ona o nei tuua’iga pepelo.”

E pei la ona ta’ua i le amata o lenei tusitusiga, na taofia faafuase’i Leiataua ma le faamasino mai Vanuatu i le malaevaalele a o sauni atu e toe malaga i o la atunuu, ae aunoa ma ni moliaga na faailoa atu o faia faasaga ia i la’ua.

O le a faatalia se isi tala lata mai o lenei mataupu, ae tasi le mea ua mautinoa o le vaiaso nei i Samoa o le a taunuu atu ai i fanua le Tausala o Samoa ae o le Tausala o le Pasefika, le tamaitai lalelei o Litara Loma Leilani Ieremia-Allan.