Ua faamaonia e le alii loia o loo tulai mo lē sa avea ma Loia Sili ia Savalenoa Mareva Betham o Dr. Rodney Harlison, ua ia taulimaina faamatalaga tusitusia faatauto a le Tamaitai Palemia, Afioga Fiame Naomi Mataafa.
Faaalia manino e Harlison e manaomia se lua vaiaso e tapena ai le tali ane a lē o loo tagi i faamatalaga ua tuuina atu e le itu tetee.
Na manino foi i le aso ananafi le iai lea o le loia mai fafo ia Benjamin Keith e toalua ma Taulapapa Brenda Heather Latu e tulai mo le itu tetee.
Faaailoa foi e le tamaitai faamasino o Tafaoimalo Leilani Tuala Warren i loia a itu e lua o loo avanoa le masina o Me ma Setema e iloilo ai le mataupu.
O lea mataupu e afua mai i le faamalolo ai o le tamaitai sa avea ma loia sili a o tulai mai lona tofiga i le masina o Setema 2021, ma o se faaiuga ua manatu Savalenoa e soli faavae ma solitulafono.
E $650,000 tala le taui o loo talosagaina e Savalenoa e totogi atu ia te ia.
O le vaiaso e amata atu i le aso 22 o Me ua atofa e iloilo ai e le faamasinoga lea mataupu.
