O loo talosaga le itu a leoleo i le Faamasinoga ina ia suesue faatasi mataupu a Malele Paulo poo King Faipopo, o Lema’i Faioso Sione ma Talalelei Pauga.
O le aoauli nei e iloa ai pe talia lea talosaga e le faamasinoga, afai ae lē talia o lona uiga o le a faaauau loa ona suesueina lea mataupu i le vaiaso nei, ae afai e talia e le faamasinoga e ono faatulaga mai se aso e suesue ai.
O le talosaga a leoleo o loo atagia mai ai e faapea na amata mai taualumaga o le tuuina mai ai o Talalelei Pauga e malaga mai i Samoa nei e tulai faatasi ma Malele Paulo ma Lema’i Faioso Sione ia Iulai o le tausaga 2021, ma e leo toe mamao ona mafai lea ona malaga mai e faataunuuina le suesueina o lea mataupu.
E ui i lea tulaga ae sa fesiligia pea e le alii faamasino ia Vui Clarence Nelson le moni o lea tulaga ona e leo faamanino atu e le loia a le itu a leoleo po o afea le aso ma le taimi e taunuu mai ai Talalelei Pauga e tulai ma i laua ia i le faamasinoga.
Na teena e loia o loo tulai mo Malele Paulo ma King Faipopo le talosaga a le itu a leoleo, ona o loo finau mai i latou o loo iai foi mataupu faaletulafono o loo mafua ai ona taofia Talalelei Pauga i Ausetalia. Ua loaloa foi aso o lea mataupu ma ua leva ona maea tapena a latou itu mo le suesuega a le Faamasinoga.
E vaiaso atoa na faatulaga e le Faamasinoga maualuga e suesueina ai le mataupu lenei faatatau i moliaga o le taupulepule e faaoo le oti i le sa avea ma palemia o le Malo Samoa i tausaga ua tuanai o loo tuuaia ai i latou nei. O le 2019 na teena ai e Malele Paulo ma Lema’i Faioso Sione o la moliaga. O loo ua maea foi le faaiuga a le faamasinoga ia Taualai Leiloa le sa ia ioeina moliaga nei ma ua tuli ai lona faasalaga i le taimi nei. Ae o loo taofia pea Talalelei Pauga i Ausetalia lea e le’o mautinoa nei pe mafai ona auai mai.
