Ua faailoa se finagalo o le aufaipisinisi i Aukilani tutotonu i le faifaitetele pea o le mau soligatulafono i lea aai ma ua talosaga ai ia faaopoopo le aofai o malu o le malo mo lo latou saogalemu aemaise foi le sologa lelei o a latou pisinisi.

Fai mai le NZ Herald i se taimi e lei mamao atu na faafaigaluega ai e le Stats NZ se sekulati i le latou ofisa i le city i Aukilani ma faailoa i le aufaigaluega e mafai ona o latou faigaluega mai le fale pe a lagona ua lē saogalemu le faigaluega i le ofisa.

E faapea foi la isi pisinisi ua faaleo foi lo latou popolega i le mataupu lava lenei.

Molimau se tasi faipisinisi na se’i mai lava lana ato mai le nofoa sa nofo ai a o faia sana meaai i le food court i le Atrium on Elliot.

O se isi tagata faigaluega na ia faamatala sa se’i ese mai e le tagata lana lunch a o savali ane e toe foi i lona ofisa, ma sa faaoolima sea tagata ia te ia ina ua taumafai atu e toe aumai lana meaai.

Ta’ua i lea lipoti se faamatalaga mai le Pulega a Aukilani ua ta’ua ai o loo latou galulue faatasi ma leoleo ma ofisa o le malo e faaleleia le aai ma ia saogalemu.

Puna o Faamatalaga: https://www.nzherald.co.nz/nz/auckland-city-centre-businesses-plea-for-greater-police-presence-as-safety-fears-keep-customers-away-from-the-cbd/POMOY7WO6BEKXMFN43NJNLL6NM