Ua amata le petition poo le talosaga aloaia o loo faia e se tasi o failafumanu i Canterbury e faatalosagaina ai le malo ia faaaogā na o le wool o loo maua mai fulufulu mamoe.
O se talosaga ua sau ai i le mae’a faia o le faaiuga a le matagaluega o aoga o le a sau mai Amerika kapeta nailoni poo le nylon e faakapeta ai le faitau selau o faleaoga i nuu i tua.
E lei fiafia iai le aufailafumanu i nuu i tua ona o lea e gau a latou pisinisi.
Na fai mai ai Ange Blair o lē e fai lana pa mamoe ma o ia foi na amataina le petition, e lē malamalama i le malo pe aisea ua filifili ai e inivesi i pisinisi Amerika e faatau mai ai a o lea e sili atu ona lelei le wool o loo sau mai fulufulu mamoe iinei, ma o loo moomia foi le tau faaolaola o pisinisi i totonu o le atunuu.
E lata i le 2,000 tagata ua sainia le petition lenei ma o lea foi o le a faaoo i le minisita.
A o faatali ai la se tali a le minisita, ae mai le matagaluega o aoga, ua fai mai e leai ma se faipisinisi i totonu o Niu Sila e gaosia kapeta nei, ma a iai foi o loo gaosia mai fafo.
