Ua augani mai le Palemia e agai e fai le tui o le fulū ma faaaogā ufi fofoga.
A o sau ai lipoti o le lē mafaamatalaina o le pisi o emergency departments a le tele o falema’i i totonu o Niu Sila, ua saunoa manino Jacinda Ardern e lē o faigofie lenei tau mālūlū.
O le lua tausaga talu ai a o iai i faigata o le Koviti e le’i iai se fulū i totonu o Niu Sila ma o lea foi sa tele ina nonofo i le fale, peitai o lea ua o faatasi le Koviti ma le fulū ma o le to’atele o tagata taofia i falema’i e mafua ona ua aafia le mānava.
O se taimi pisi tele mo auaunaga a le soifua mālōlōina, ma o le fautuaga o le agai e faia tui o le fulū.
O le tui ma faia o ufi fofoga o le fesoasoani foi lea i le vaega a le soifua mālōlōina e pei ona saunoa le Palemia.
O le faai’uga o le vaiaso faato’ā uma atu na totogi ai e le District Health Board a Manukau foma’i faaleaiga poo GP latou te vaaia fua ai gasegase ina ia fesoasoani ai ie Middlemore ma lana avega.
O se faiga e talitonu le Palemia o le a amo faatasi ai le avega o loo iai i le taimi nei.
