O le uluai Aso Gafua o lenei masina fou o Oketopa ua faamanatu ai e tagata faigaluega uma a le Malo o Samoa le aso faamanatu mo i latou e faailoga ai le latou tautua i le autu ua atofaina mo lenei tausaga, o le Talofa ma le lau Fofoga Fiafia.

O ni vaega tāua tele lea i le latou auaunaga faatino mo le atunuu i aso uma e pei ona faailoa i se pepa faalauiloa mai le ofisa o le Komisi o tagata faigaluega a le Malo.

O le 12 a’i lenei o tausaga o faamanatu pea lea aso tāua, ma o le polokalame mo lenei tausaga o le solo a tagata faigaluega e taunuu i luma maota o le Malo i le eleele fou o le a faia ai le sauniga lotu ma le saunoaga autu mai le Sui Palemia le afioga Tuala Tevaga Iosefo Ponifasio.

O le a faalauiloa ai foi ma le polokalame autu ua faaigoaina o le Talofa ma le Laufofoga Fiafia.

O le taeao e faatino ai auaunaga masani a matagaluega a le Malo, ae o le ‘afa aso o lenei Aso Gafua i Samoa mai le tasi e oo i le lima i le afiafi e faia ai polokalame a matagaluega e faatāua ai le sao o a latou faigaluega i le atinae o le atunuu. 

Ua aumai ai ma le faamanatu a le Komisi e pulea tagata faigaluega a le Malo, e lē o se aso malolo le ‘afa aso lea.

O lona uiga e faigaluega tagata uma.