A o lumana’i ai le tatalaina o talosaga mo ē agavaa i le sitiseni Niu Sila i le Aso Lua o le vaiaso nei, o lea ua faalauiloa mai i se pepa o faamatalaga e se matai o le afio’aga o Samatau le tofa Pa’u Teleiai Fereti Puni, le talisapaia e alo ma fanau o Samatau o loo alala i atunuu mamao o lea faamanuiaga mo le aumatutua o le afio’aga.
I se finagalo o le tofa i le tootoo ia Pa’u Teleiai Fereti Puni o se tasi o le komiti faafoe o le Samatau Next Generation, i le pepa o faamatalaga o loo ia faaalia ai, ‘E toe maua tupe, ae lē toe maua le taimi; o le a gafa le Samatau Next Generation ma le faatupeina o talosaga uma a tamā ma tinā matutua o le nuu.’
O le Samatau Next Generation ua iloga lona sao i atina’e a le afio’aga o Samatau i le faaleleia o le aoga tulagalua a le afio’aga, o atina’e i autaaalo, faapea foi le lagolago i le aufaifaato’aga.
Faaalia e le Tuua o Loufono Alapati Too o le SNG, “O le to’atele o i latou ua fai i lagi matua, ae ia aogā le sitiseni NZ mo tamā ma tinā matutua o le nuu o loo soifua mai.”
O se mea’alofa sili lea ona tāua o le Kerisimasi o lenei tausaga.
O le sitiseni Niu Sila mo tuaasinasina uma o le afioaga o Samatau.
