Ua toe tolu nei masina mai le masina fou o Mati seia mae’a le masina o Me ona mae’a lea o polokalame o le faamanatuina o le 60 tausaga o le Tutoatasi.
O lea ua iai le finagalo o le Malo e taualuga i se tasi o aso tau talafaasolopito o le Ekalesia Katoliko i Samoa, o le faailogaina o le 178 tausaga talu ona taunuu i Samoa.
O le afioaga o Lealatele i le itumalo o Gagaemauga Numera 1 lea na muamua taunuu iai le lotu Katoliko o le a talimalo ai e pei ona faailoa e le faipule o le itumalo le afioga i le Sui Palemia, afioga Tuala Tevaga Iosefo Ponifasio, i lana saunoaga o le tatalaina o le ofisa tutotonu o le Fono Faavae a lona itumalo faapalota.
O le aso 26 ma le 27 o Me ua faatulaga e faia ai lea sauniga i Lealatele, ma o le a auai taitai o le Malo aemaise o taitai ma tagata tapuai o le Ekalesia Katoliko i Samoa.
O se tasi lea o tapenaga a Gagaemauga Numera 1 o loo faagasolo e pei ona faailoa e lo latou sui faipule e fia faaleleia o latou aulatetele, ma nofoaga e pei o Malumalu tapuai, faapea totonu o le afioaga o Lealatele o le a faailoga ai le 178 tausaga talu ona taunuu le Ekalesia Katoliko.
