O Iulai o le tausaga fou ua faamoemoe o le a faamanatu ma faailoga ai le aso fanau tele o le Malisi o le atoaga o lona selau tausaga talu ona oo mai i Samoa.
Ua faailoa lea aso tele o le Malisi i se pepa o faamatalaga ua faailoa ai le talimalo ai o le autapolo a le kalapu i le isi taamilosaga tapolo ma isi o latou sui Malisi mai Niu Sila ma Ausetalia, ae avanoa ai foi ona tausinio ma sui o le Malisi mai Amerika Samoa ma le Iunaite Setete.
O lea ua toe taliu mai i le atunuu le autapolo e toa 16 a le Malisi mai Samoa sa malaga i se latou tausinioga ma sui o le Malisi i Niu Sila ma Ausetalia o loo fiafia e taaalo ma atinae lea taaloga.
O le mafuaga lea ua a’e ai se finagalo o le a talimalo Samoa i le taamilosaga o le tausaga fou, o le a faia i le aso 8 e oo i le aso 10 o Aokuso 2024 pe a mae’a sauniga o le selau tausaga o le Malisi i le aso 29 o Iulai i le aso 4 o Aokuso o le tausaga fou lava.
Ua faailoa i le pepa o faamatalaga o le taamilosaga tapolo ua amatalia i le tausaga nei, o se fuafuaga lelei tele o le a avea ma tausinioga e maua ai pea le mafutaga ma le sootaga o sui o le Malisi o loo i Samoa ma isi atunuu o loo aumau ma faamautu ai.
