E lē o toe mamao ona faailoa mai lea e le malo o ana fuafuaga o loo taumafai e vave aveese mai ai tagata ua fai sina umi o nonofo i emergency housing, ae saili ni fale mautu.
Na faailoa e le minisita o fale, Chris Bishop o le vaiaso fou o le a faamautu ai nei tulaga, a o lei mae’a le piriota o le 100 aso i le Aso Faraile lea o loo galue agai iai fuafuaga a le faigamalo fou.
O suiga nei ua ta’ua e le minisita o le a faaitiitia ai le fuainumera o tagata e nonofo i faletalimalo lea o loo faaaogāina nei emergency housing ma tuu mai foi i lalo le paketi o loo faaagaga mo fale nei.
O loo ave le faamuamua i aiga ua silia ma le 12 vaiaso o nonofo i emergency housing ae taumafai e sailia ni fale i le social housing.
Ripotia e tusa ma le 1,665 aiga, tusa lea o le faitau afe o tagata ua silia ma le 3 masina o nonofo i faletalimalo, ma e oo mai i le masina o Ianuari o le tausaga nei e 144 aiga ua silia ma le 2 tausaga o nonofo i emergency motels.
I le va o Iuni 2016 ma Iuni 2023 ua silia ma le $1.4 piliona tala Niu Sila tupe ua faaalu i emergency housing grants, poo tupe nei e faaalu i faletalimalo a emergency housing e lē toe totogia mai.
A o agai ai le malo i aiga, o lea foi ua tagai i le ono faamalosia ma faia siaki i faletalimalo o loo faaaogā ona o le tele o faitioga a tagata i iniseti faapei o mogamoga, lē lelei ma lē saogalemu; lea e mafua ai ona toe foi isi tagata e momoe i totonu o taavale.
