Ua tele aso ma masina o faatino mai le matāupu o loo su’esu’eina ai lē sa avea ma Sui Komesina o le Matāgaluega o Leoleo, le alii o Jevon McSkimming, ae o lea ua faailoa mai e auala o faasalalauga a le leitio faavaomalo, o le Aso Lulu o le vaiaso nei, o le a tōlaulau ai le faai’uga a le Faamasinoga Faaitumalo i Ueligitone; e tusa ai ma moliaga faasaga ia McSkimming.
O lenei i’uga o le a maua mai lea ia latou iloiloga, aemaise tulaga o le ioeina uma ai e McSkimming o moliaga e 3, e fesoota’i lea i ni faamaumauga ma’ale’ale e pei ona iai ni ata pu’e o loo aafia ai ni fanauiti (three representative charges of possessing objectionable publications, including child sexual exploitation and bestiality material).
Na faamālōlō mo se taimi lē tumau Jevon i le masina o Tesema o le tausaga ua mave atu, i tuua’iga i matāupu e fesoota’i i faigaaiga (sexual misconduct) ae i le faasolo ai o iloiloga o lea na maitauina ai foi le faaopoopo ai o nisi o faafitauli ma tuua’iga sa faia faasaga lava ia McSkimming e pei ona alia’e mai i le masina o Mati ma faatino su’esu’ega ina ua māua e le auaunaga faamaumauga ma ata pu’e i luga o le telefoni na ia faaaogā a o iai i le galuega.
E faamauina na faamavae aloa’ia Jevon McSkimming mai le tofiga i le masina o Me, ma faamuta ai le 29 tausaga talu ona avea o ia ma malu o le malo.
Mo le silafia o lenei foi matāupu na māua ai i se lipoti a le Independent Police Conduct Authority le lē sa’o foi o faai’uga ma gaioiga a sui sinia o le matāgaluega e aofia ai foi lē sa avea ma Komesina, Andrew Coster, i le ufiufi ai o matāupu o loo aafia ai McSkimming.
Puna o Faamatalaga: https://www.rnz.co.nz/news/national/581900/disgraced-former-top-cop-jevon-mcskimming-set-to-be-sentenced
