Ua molia e leoleo se tamā 60 tausaga o le soifua i le maliiliu ai o se tamā ma lona atalii i le faalavelave na tulai mai i le afioaga o Fogapoa i Savaii i le Aso Tofi na te’a nei.

Faaalia e le Sui Komesina o leoleo le susuga Auapaau Logoitino Filipo, o le mae’a tupu o le faalavelave lea ua masalomia na faaaogā ai se laau malosi, na oo atu ai i Tuasivi lē ua molia ma faailoa atu lona tagata i leoleo.

O le Aso Toonai na te’a nei na faatino ai e le aiga o lē ua tuua’ia le Ifoga i le aiga o i laua ua maliliu. O loo nofo taofia le tamā ua molia i le vaaiga a leoleo e faatali ai le aso e tulai ai i le faamasinoga.