Ua talia e le faamasinoga le talosaga a leoleo e faaaogā le ata video mai le polokalame o le Lauao Sinasina a le faletelevise o le EFKS TV2, e avea ma molimau autu e lagolago ai le moliaga o le faia o tala taufaaleaga o loo molia ai Paepaetele Junior Betham, o se tasi sa galue o se leoleo poo se Malu o le Malo.

O le Aso Faraile na te’a nei na aumai ai lea faai’uga a le afioga i le faamasino, Loau Donald Kerslake, o loo tagofia le suesueina o mau o le moliaga ma mau tetee a lē ua molia. O le talia o lea vaega o molimau a leoleo na tulai ai ma le tamaitai ta’ita’i leoleo sa faia le suesuega mo lana molimau tuu fofoga.

O loo molia Paepaetele i se tuua’iga na ia faaleo i le polokalame a le fale televise ia Mati o le tausaga na te’a nei, sa ia faailoa ai se gaioiga a se tasi sa avea ma komesina lagolago o Nafo’itoa Talaimanu Keti lea sa avea foi ma sui fofoga fetalai o le Palemene o le atunuu na taumafai ai e faamalosi se tamaitai leoleo.

O lea tuua’iga o le mafuaaga lea o le tagi a Nafo’itoa na faaulu i leoleo ua ia teena ai ia faamatalaga ma ua faaleaga ai lona tagata ma lona aiga. Ua tālia nei folasaga ma finauga faai’u a loia a itu e lua, a o le’i aumaia se faaiuga a le faamasinoga.  

I se isi o mataupu i le faamasinoga, o lea ua tolopo le tuuina atu o folasaga faai’u a loia i le mae’a suesueina o molimau lagolago ma molimau tetee i moliaga o le umia o le aisa, umia o laau malosi, ma le umia o paipa e fesoota’i i fualaau ma pauta faasāina poo nakoti, o loo tuua’ia ai Afualo Daryl Mapu ma Marie Fanueli o ni tagata faigaluega i le Ofisa o le Komisi o faigapalota.

E lua molimau na taualuga iai suesuega o le molimau a Afualo Daryl Mapu ma le molimau a se taulealea sa nofo ai i le fale o Mapu. Na faailoa e le molimau o Pelepesite, o ia e ana uma laau malosi, o taga pepa iila laiti sa iai le pauta o le aisa, faapea ma paipa. O le vaiaso asau e tuuina atu ai folasaga faai’u mo se iloiloga a le faamasinoga sili mo sana faai’uga.