E foliga e le o iai se popolega o le tamaitai Palemia i le iuga o se palota faataitai ua faalauiloa i le asō e ono fausia ai se soofaatasi i nisi o vaega faaupufai.
Fai mai le Palemia Jacinda Ardern o ia e le fua lana taitaiga i ni iuga o ni palota faataitai ae o lana taitaiga e mo tagata ma o latou manaoga.
O le tali lea a le Palemia ina ua faatalanoa i luga o le Breakfast Show a le Televise tasi i le asō e faatatau i le iuga o le palota na faatautaia e le Rid Research a le Newshub ua faailoa ai e 40.7 pasene o tagata na palota e ‘au i le National, 32.3 pasene palota mo le Leipa, 10 pasene mo le ACT, 9.5 mo le Green ma afai ae faapea o le iuga lea ole palota i le tausaga nei o lona uiga ua mafai ona fausia se soofaatasi a le National ma le Act ma faatuina ai se faigamalo.
Ta’ua e le Palemia i lea faatalanoaga e fai foi palota faataitai a le Leipa latou ma o loo fai foi si maomao atu o le palota.
Ta’ua e le Palemia e faigata atu isi tulaga na iai muamua le Leipa ma sau ai malo i le palota ona o loo taulai pea le latou vaai i tagata.
