O le faamutaina o le taimi galue a le Ofisa Sili o le Matagaluega o Aoga Taaloga ma Aganuu ia Afamasaga Dr. Karoline Afamasaga Fuatai ua tali iai le tamaitai Palemia ina ua fesiligia i le feiloaiga ma Tusitala i le vaiaso nei.
Ua faaalia e le afioga Fiame Naomi Mataafa o le faasalalauga na saini iai le Ofisa Sili ua faamuta nei lona taimi galue na faailoa ai le faaauau pea ona tapunia o Aoga uma i le atunuu i le tuanai ai o le faasalalauga mai le Mālō na see mai ai puipuiga a Samoa ona o le faama’i mai le Vaega 2 i le Vaega 1 o le mafuaaga lea o le faaiuga a le Kapeneta.
“E pei o le mafuaaga autu lena e ui ina toe faaui i tua le faasalalauga a le Matagaluega o Aoga ae ua manatu le Kapeneta e le’o se mea lelei le mea na tupu. E le’i uma le piriota sa faagasolo ai a tatou poloaiga ma aiaiga o lena aso sa tatau lava i le nofoā Matagaluega ona faatali ma mataitū lelei le faaiuga e tuuina atu i le tatou mataupu lea.”
Taua foi e Fiame “E le gata la i le tulaga lava lea o le aloaia o faaiuga fai a le tatou Mālō ae tatau foi ona tatou manatua o poloaiga o le tulafono foi lea ma e lē tatau i le vaaiga a le Kapeneta ona tuu māmāina ia tulaga ma e tatau lava ona mata’alia ma tausisi i ē e faauluulu iai ia matagaluega i faaiuga e faapena ona faataatia atu i lea taimi i lea taimi”.
O isi Ofisa Sili ua faamālōlō e pei o le Faauluuluga o le Matagaluega Tetele a le Mālō faapea le Matagaluega o fesootaiga ma faamatalaga tekonolosi faapea le Ofisa Sili o le Matagaluega o Tupe Maua ua maea le tolu tausaga o latou konekarate.
