O le siitia o le tamaoaiga o le atunuu e pei ona molimauina i le tausaga faaletupe o loo faagasolo i le taimi nei ma e mae’a i le faaiuga o le masina fou o Iuni, ua silasila ai le Malo e toe faia se fetuuna’iga i totogi o tagata faigaluega uma a le Malo.
O lea toe fetuuna’iga o le a siitia ai totogi o tagata faigaluega mai le vaega i lalo e oo i tulaga o sinia poo principal officers i le 10 pasene, 5 pasene le siitaga o totogi o i latou e i luga atu o ofisa sinia, ae 3 pasene le siitaga o totogi o tagata faigaluega a le malo i le tulaga o Ofisa Sili poo faauluuluga o matagaluega ma faalapotopotoga a le Malo, faapea tulaga tofi taualoa poo i latou o umia tofiga e amata mai i le Ao o le Malo.
O loo fuafua e faatino lea fetuunaiga o totogi o tagata faigaluega uma a le Malo i totonu o le lua tausaga e amata atu i le tausaga faaletupe fou e amata i le masina o Iulai o le tausaga nei.
O le a amata ai foi lea siitaga o totogi i le aso 8 o lea lava masina.
O lona uiga e faatino auauai seia faasopolia uma tagata faigaluega a le Malo ma ē o umia tulaga taualoa.
O le fuafuaga lenei e tatau ona oo atu i le faaiuga o le masina o Iuni o le tausaga e 2025 ua mae’a ona faatino.
