Ua leva ona tapena nisi o le mamalu o le atunuu o loo latou lagolagoina le vaega faupufai a le HRPP o loo alala i Aukilani e fia feiloai atu i le susuga i le taitai o le vaega faaupufai le susuga ia Tuilaepa Lupesoliai Dr. Sailele Malielegaoi faapea afioga i alii ma tamaitai faipule.
O le auga ma le autu o le manaoga o le aulagolago i Aukilani se’i malaga mai le vaega faaupufai se’i latou feiloai ma se’i toe aoao mālū mai manogi o le lolo e ala i le lagolago a le atunuu ona ua tau solomuli atu i tua ma le vaega faaupufai ona o le malosi lava o faamatalaga o loo feaveai solo i luga o upega tafailagi.
O se faamoemoe ua leva ona loloma ma faufau e le susuga i le taitaifono ma le mafutaga a le HRPP i Aukilani, ma se’i tau saili se laolao lelei e maua uma ai avanoa a afioga i alii faipule o le vaega faaupufai e malaga uma mai ai se’i tali le manaoga o le mafutaga i Aukilani.
O le taimi muamua lenei ua tupu ai se malaga a le HRPP ua malaga mai ai i Niu Sila e feiloai ma lana aulagolago.
O le faaiuga o le vaiaso ua mavae na talimalo ai loa le mafutaga a le HRPP i Aukilani i le sii mai o le fala siigata a le vaega faaupufai.
Na malaga uma mai afioga i alii ma tamaitai faipule faapea le susuga i le taitai o le vaega faaupufai o loo puipuia le aiātatau a tagata ia Tuilaepa Lupesoliai Dr. Sailele Malielegaoi, faapea foi nisi o sui a faipule sa iai i le paeaiga muamua a ua lē toe manuia mai ae o loo tumau pea le lagolago i le pati, ae se’i vagana nisi o sui a faipule e toalua e lei mafai ona auai mai ona o nisi o tuatuagia.
Na tatala le feiloaiga a le vaega faaupufai ma le mafutaga i se taumafataga tele sa faia i se tasi o faletalimalo tele i le taulaga i Aukilani, le Cordis Hotel, lea na vaaia ai le faatumulia o le mamalu o le atunuu sa auai.
O le taeao o le Aso Toonai na maua ai le avanoa e toe faafesagai ai segaula i le aulagolago ma le vaega faaupufai e ala i le ‘ava o le feiloaiga e pei ona masani ai Samoa i ana taligamalo, lea sa faia i le maota i Malaeola i Magele.
O se faatasiga na maitauina ai le lolofi atu o nai tuaa sinasina se’i toe mafuta atu ma momoli atu le tofa a le atunuu e faamalosiau ai le vaega faaupufai auā le isi faamoemoe tele o le faigapalota o loo loma nei.
Na mae’a le ‘ava ona sosoo lea ma nisi o faafiafiaga e ala i siva Samoa e momoli ai pea le lofo fiafia ma le agaga meemee o le aulagolago e fai meaalofa ai i afioga i faipule.
O le taeao o le Aso Sa na taualuga ai le mafutaga i se toonai faamavae a le mafutaga i Aukilani ma le aumalaga, ma o se toonai na vaaia ai loimata maligi o afioga i faipule a o faaleo mai lo latou agaga faafetai e tali ai le valevale alofa ma le agalelei o le mamalu o le atunuu o loo i Aotearoa faapea ma Ausetalia.
O le Aso Lua ma le Aso Lulu na amata toe taliu ai le faigamalaga a le HRPP i Samoa auā le toe faaauauina o galuega.
O le faamoemoe sa faatinoina nei a le aulagolago a le HRPP sa malaga mai ai nisi o sui mai nisi o vaega o Ausetalia, faapea sui mai Ueligitone ma Kalaiesetete e galulue faatasi ma opogi le faamoemoe.
O se faatasiga fiafia ua maua e tagata uma auā ua maua le feiloaiga fiafia ma afioga i faipule ae ua maua ai ma le mafutaga fiafia ma le aulagolago a le HRPP o loo i atunuu i fafo
