O le tusi a le Fofoga Fetalai na tali atu ai i le
tusi a le taitai o le Ituagai lea na talosaga ai e faasolomuli le Sui Fofoga Fetalai mai le tofiga Taitaifono o le Komiti suesue a le Palemene o lea ua toe tali atu iai le susuga Tuilaepa Lupesoliai Sailele Malielegaoi e pei ona taulimaina se kopi o lea finagalo tusitusia o le taitai o le Ituagai.
Ua sa’i ai le finagalo o Tuilaepa i le Fofoga Fetalai le susuga Papalii Li’o Taeu Masepau i lona faalauaitele o se sona lagona i lana tusi na ave ai i le Aso 9 o Mati. Taua e Tuilaepa e le’i kopia lana tusi muamua i le Tamaitai Palemia ae na tuu sa’o i le Fofoga Fetalai o loo faatamā uma iai sui faipule o le Palemene.
Sa ia faia lea tulaga ona o loo tele foi isi tiute taua o le taitai o le Mālō ae o lana talosaga ma faaolooloma’au ai i le Fofogq Fetalai e tusa ma le avea o le Sui Fofoga Fetalai ma Taitaifono ma a lē talia lana tuualalo o le faaiuga tu tasi lea a le Fofoga o le fono.
Faaalia e Tuilaepa e le’o ni futia ua sola na mafua ai lana tusi ae o futia ua ia faamatalaina o loo namuleaga i le taimi nei o loo ia faataua.
O se vaega o lea tusi e faitauina faapea;
“E le’o a’u foi o se tamaititi lea e afua ai ona o’u tusi atu, ua 8 Fofoga Fetalai ua o’u mafuta iai, 10 nofoaiga a le Palemene e aofia ai ma nofoaiga pupuu ta’i tolu tausaga ae faatoa o’u feagai lea ma se Fofoga Fetalai ua ia faia ni faaiuga maoa’e e le’o faataga i lalo o le tulafono tumau. E le’i atoa foi sou 6 masina e faafoe ai fono a le Palemene ae ua faaaoga lou lava malosi e tutuli ai faipule o le maota i le latou faaaoga lea o le social media. O le latou lea aiā tatau e faaleo saoloto ai o latou manatu i fafo atu o le Palemene e faapei ona faataga i le tulafono faavae. O aga foi ia o faapalemene o le
taupulega, uma lelei nofoaiga a Leaupepe ma Laauli o Fofoga Fetalai ma muamua atu ia te oe, la te le’i faia ni faaiuga maoa’e e pei ona e faia. E oo i le faatautō o matou o faipule a le HRPP pe ana matou lē toe tāpā le faamasinoga tafēfē i le mamalu o le Fono Aoao Faitulafono a le Mālō o Samoa ua matuā soli e lau afioga ma au faaiuga soona fai, e lē aliali ai ina sou atamai. Ua e taua ua taufaafefe si a’u faamanatu vaivai na faataatia i ou tafatafa ia aua nei galo o loo iai le tafatolu fefaatauagai o loo iai le latou foi malosi faalefaavae e faamasino ai i tatou o faia tulafono i le tatou toe soli o tulafono na tatou pasia. O le malu lena mo soo se tagata poo se vaega ua aafia o latou aiā tatau i faaiuga soona fai a tatou e faia tulafono. O lona uiga ea o lou finagalo aua nei o’u taua lea itu ona e te lē fefe i le faamasinoga. Oi tafefe ua matuā maualuga tele le mea ua e nofonofo mai ai, sau i lalo o afioga a le Alii a e fia muamua , mulimuli. O lou laulau mai o le taitaifono o le Komiti e lē taofia le toe see ane e fai sana molimau faasui faipule se oute ofo poo fea e te aumaia ai nei manatu lē faavaea, o le conflict o le interest le faiga lena. O oe sa e leoleo i lalo o la’u vaaiga e ao ai ona e toe manatu loloto ou te le’o talanoa pogisa atu ou te malamalama lelei i ou uiga faatagata soifua. Pau lava le itu o loo agai atu iai se taofi vaivai o le faasologa o tatou galuega ia sosolo pea i luga o tulafono tumau lea e aloaia ai tulaga uma masani transparency and accountability. O le faiga lena e taofia ai uma ai uiga e ono lapelapea ai faaiuga lelei e puipuia ai le mamalu o le Palemene ma tapena lelei ai ripoti a Komiti suesue uma a le Palemene ma atagia ai iuga e amiotonu. E iai lipoti a se tasi o Komiti o le Palemene i tausaga ua tuanai e tolaulau mai le ripoti a le taitaifono ae tutū a’e isi o le Komiti ma saunoa tetee i le ripoti na fai toatasi e le taitaifono o se mafuaaga e le’i saini ai isi sui o le Komiti e faailoa ai se ripoti i le Palemene ua le’o amiotonu ona fai.”
O se tasi o vaega o le tusi ua faailoa ai e Tuilaepa i le Fofoga o le Fono ia fesili i se tasi o tamaitai o le atunuu ma avea ma Loia Sili o ia lea o loo fautuaina le Mālō i tulafono le afioga Taulapapa Brenda Heather Latu mo se fautuaga e faatonu folau ai lana pitolaau.
Ua faamalulu ai le taitai o le Ituagai i le Fofoga Fetalai i le vaega faaiu o lana tusi ma ia faaalia pe afai ua pāopapa sana faamatalaga e le mafai ona aveesea ai lona faaaloalo tele i le Fofoga Fetalai.
Ua faaalia e Papalii i le Sunday Samoan e tumau lana faaiuga e teena le manao o le
Taitai o le Ituagai i le aveesea lea o le Sui Fofoga Fetalai ma le tofiga taitaifono o le Komiti a le Palemene o loo suesueina le mataupu i le eseese o kopi o le tulafono o fanua ma Suafa o le tausaga 2020 na pasia e le Palemene ia Tesema o lena lava tausaga.
