O le masina na se’i mavae atu nei ia Aperila, na pasia aloa’ia ai teuteuga o le tulafono, i le ono faamuta ai o visa nofomau mo tagata sulufa’i mai i totonu o Niu Sila pe a oo ina iai i se tulaga e aafia ai le saogalemu lautele talu lea tagata sulufa’i.
Ua faamauina i lipoti mai le leitio faavaomalo a Niu Sila, o lenei fuafuaga sa amata talanoaina ma iloilo ona o le mataupu na tulai mai i le tausaga 2021.
O se faalavelave na osofa’ia ai e se alii sulufa’i, ia Ahamed Samsudeen le to’alima o tagata i totonu o se Supamaketi i Aukilani.
I lea mataupu na ta’ua ai le tele o vaega e le’i mafai e tulafono a Niu Sila ona faatino i se tagata sulufa’i e faatupu faalavelave, ona o le lavelave o mataupu faapenei i le tulaga faavaomalo, e pei ona maitauina, a o le’i tula’i mai lea faalavelave, sa faamuta le visa nofomau a Samsudeen ina ua aafia i le tulafono, ae e le’i mafai ona toe tipoti i lona atunuu, ona o puipuiga o tulafono faavaomalo.
Sa nofo vaavaaia o ia i Niu Sila nei, ma i’u ai lava ina ia faatino le soligatulafono mata’utia e pei ona ia faaoomanu’a ai i tagata e to’alima, ma na oo ai lava ina fana e leoleo talu ai lana gaioiga ua fai.
Ma o teuteuga o le tulafono ua pasia nei, ua suia mai ai nei le visa mo tagata sulufa’i e aumau ma nonofo i totonu o le atunuu aga’i i le visa mo se taimi lē tumau.
Peitai e lē o mafai ona tipoti pe aveese faamalosi lea tagata mai le atunuu ona o puipuiga lava o tulafono faavaomalo, se’i vaganā ua faamaonia le saogalemu o le atunuu na malaga mai ai lea tagata sulufa’i.
I le itu o le malo o loo ta’ua ai e le Minisita o Femalagaa’iga ia Erica Stanford o lenei fuafuaga o le a tuuitiitia ai le tele o avanoa e maua e i latou e solitulafono, ma faasolo ai ina oo i le tulaga e filifili ai lava i latou e o ese mai le atunuu.
Ae ua faaalia e nisi o loia, e lē taulau faamoemoega ua faatino nei e le malo.
Puna o Faamatalaga: https://www.rnz.co.nz/news/national/560647/dangerous-refugees-would-be-stripped-of-residence-under-new-law
