O le sikoa mata’ina a le alii o Max Jorgensen na faamautū ai le malo a le Wallabies ia Egelani ina ua mae’a le taimi o le la taaloga mata’ina i le malae i Twickenham.
O ‘ai o lea taaloga, Wallabies 42-37 Egelani.
O le ulua’i taaloga lea o le malaga taamilo a le Wallabies i Peretania ae i Ausetalia lava ia o talanoaga o loo faaautū i le alii talavou o Joseph Suaalii ma lana taalo aemaise i le tele o finagalo faaalia a o le’i faia le taaloga na upuia ai e nisi le faai’uga a le faia’oga o le ‘au, Joe Schmidt e faataalo Suaalii.
Fai mai nisi finagalo e le’i lava se iloa o le alii talavou i le taaloga a o nisi ua faaseā i le vaegatupe tele ua tuuina i lana konekarate.
Ui i lea ua faamalolo uma e Suaalii le tele o ia finagalo faaalia i le mataina o lana taumafai i lea taaloga ma ia maua ai le faailoga o le tama taalo o le taaloga ma le anoanoai o feau faamalosi ma faamalo i le alii talavou ua tuuina i luga o upega tafailagi ma le social media.
O nisi foi o tama o le Wallabies sa o latou lagolagoina Suaalii ma faailoa le lē fiafia i le tele o le ‘aufaitio.
I se faatalanoaga i le Stan Sport na faamatala ai e Suaalii na amata taalo mai le lakapi i le 4 o ona tausaga ma sa ia manatua se tasi taaloga a Samoa ma Egelani na o ai ma lona tamā a o laitiiti i le 2003 a o lea la ua oo ina taalo faasaga ia Egelani o se tulaga uigaese foi.
O le ulua’i taaloga lea a Suaalii i le ‘au tele a Ausetalia talu ona sui mai i le Iuni a o lea ua amata i le mauaina o le tama taalo o le taaloga, Man of the Match.
Puna o Faamatalaga: https://www.google.com/amp/s/amp.nine.com.au/article/12e12a46-f200-4f05-a030-4f2a5ca754eb
