Ua mae’a ona faatulaga e le faamasinoga o faigāpalota aso e su’esu’e ai tagi ua lu’i ai e nisi o sui faatutū o le faigāpalota o loo loma agavaa o nisi o sui tauva ma faai’uga a le Komesina o faigāpalota.
O le mae’a o le valaauga muamua o matāupu e sefulutasi na faaulu e lua tagi ua toe faaui i tua ma o lu’i uma ia mai le itumalo faapalota o Faasaleleaga muamua.
O le tagi a Seumanu Saunoaimalu Nuu Faimata Su’a faasaga i le sui tauva tama’ita’i o Matamua Seumanu Vasati Sili Pulufana ma le Komesina o faigāpalota ua toe faaui i tua, faapea ai ma le tagi a Leatigaga Matafai Iiga Lauina faasaga i le sui tauva o Pipi Pauli Tevita Tariu ma le Komesina o faigāpalota ua faasolomuli foi i tua.
I matāupu tau faamasinoga e iva o loo tumau pea o le Aso Lulu o le vaiaso nei e amata su’esu’e ai le tagi mai le itumalo o Gagaifomauga 3 lea o loo lu’i ai e le sui tauva le susuga Laaulialemalietoa Polataivao Leuatea Polataivao Fosi Schmidt le agavaa o le sui tauva tama’ita’i le afioga Faaulusau Faatoatoa Rosa Duffy Stowers.
O loo molia ai foi ma le Komesina o faigāpalota i lea tagi.
O le tagi a Ale Vena Ale mai le itumalo palota o Faleata 4 faasaga i le sui faatū o Pepe Christian Fruean ma le Komesina o faigāpalota o le a fofogaina foi i le Aso Lulu nei, faapea le tagi mai le itumalo palota o Faleata 3 i le lu’i a le sui tauva o Paloa Louis James Stowers faasaga i le faai’uga a le Komesina o faigāpalota ma le agavaa o le sui tauva o Lealailepule Rimoni Aiafi.
O le Aso Lulu foi e su’esu’e ai lu’i poo tagi mai le itumalo o Faleata 2 i le va o Leatinuu Wayne Sooialo faasaga i sui tauva o Ulugia Elon Piliopo Betham ma le sui tauva tama’ita’i o Muaaufaalele Mary Faafouina Ta’eu.
O le aso foi lea e su’esu’e ai le lu’i a Muaaufaalele Mary Faafouina Ta’eu faasaga i le tofa Leatinuu Wayne Sooialo.
O loo molia foi ma le Komesina o faigāpalota i ia tagi.
O isi tagi ua faatulaga e su’esu’eina i le aso 4, 5, 8 ma le aso 12 o Aokuso a o lumanai le Aso Faraile 15 o le masina fou e aumai ai faai’uga uma o ia tagi poo lu’i faasaga i agavaa o nisi o sui faatutū ma faai’uga a le Komesina o faigāpalota.
