I le tolu vaiaso talu ona faaletonu le eletise i le motu o Upolu ma faasoasoa ai e ala i le titina o le uila i isi vaega o le motu ae faaola isi vaega, o le Aso Sa ananafi i Samoa, na faato’ā taofia ai le faasoaina o le eletise ina ua faailoa e le faalapotopotoga o le malosi tau eletise, ua lava lana faasoa mo le motu atoa e aunoa ma le motusia.
O nuu i le Palisi Feeder ma Lefaga Feeder sa faatulaga e lē maua se eletise mai le 8 i le taeao o le Aso Sa e oo i le 6 i le afiafi.
Ae sa faaauau ona motusia le eletise i le afiafi mai le 6 e tau i le 12 o le vaeluaga o le po o le Aso Sa mo nuu i le Industrial Feeder ma le Beachroad Feeder.
O loo i Niu Sila le minisita o le faalapotopotoga o le eletise mo le faia o se feutana’iga ma lea malo i se fesoasoani e faaaogā ai se vaalele o le fitafita a Niu Sila e aumai ai afi e lima e faaaogā i se tulaga lisi, e faatali ai afi fou e lua o loo oka lea 3 masina e faatali ai.
O ia afi fou o loo aumai mai Saina.
Ua faaalia e le Minisita le tofa Olo Afoa Fiti Vaai, o le talosagaina o se vaalele o le fitafita a Niu Sila ua taatia atu i le Palemia ma le Kapeneta, ae a o tālia ai afi fou e lua ma afi e lima a se kamupani Niu Sila sa faaaogā foi i se tulaga lisi e se kamupani i Fiti lea o le a lisi mo se taimi lē tumau, o se tala fiafia mai le minisita le logoina o ia e le pulega o le faalapotopotoga o le eletise i le toe faaleleia o se faaletonu na mafua ai ona lē ola le afi eletise i Tanugamanono, ma ua toe ola ai lea afi ma fesoasoani i le eletise maua mo Upolu.
O le malaga a le Minisita i le fono a minisita o vaalele sivili a le Pasefika na ia sa’ili ai ma afi eletise e lima o le a aumai i se tulaga lisi e faaaogā mo se taimi lē tumau.
E lē o mafai ona iloa i le taimi nei se tau o le a lisi ai ia afi eletise.
O loo iai le fuafuaga e pei ona faailoa e le minisita le tofa Olo Afoa Fiti Vaai, o le taimi lava e taunuu ai afi fou e lua ma faapipii ma faaaogā, ona toe faafoi lea o afi e lima o le a lisi e le faalapotopotoga o le malosi faaeletise e fesoasoani i le toe faaleleia o lana tautua i le motu atoa o Upolu.
