Ua faamauina nei i talafaasolopito o galuega a le Faamasinoga o Faigāpalota a Samoa le matāupu i le tagi tau palota mai Falealili 1, o se ulua’i matāupu tau faamasinoga o faigāpalota ua teena ma lē talia le tatalo a le itu na tagi ma le itu na faasaga iai moliaga ina ia toe ave i tua, i māfua’aga o le tausia o le nonofo fealofani ma le filemu o tagata o le itumalo.
E pei ona silafia o le tele o matāupu tau faamasinoga e tuuina atu ai ni moliaga o faiga faaālatua i le faatosina o tagata palota i tupe ma taumafa faapea le ‘avamalosi, e iai loa se feiloa’iga e faia i le faamoemoe e toe ave i tua, e oo loa i le faamasinoga sea maliega e leai lava se isi laasaga e taunuu iai, o le talia loa e le faamasinoga ina ua faamalieina aiaiga o le tulafono ma faasolomuli loa i tua se tagi.
Peita’i o le taimi muamua lenei ua oo atu ai se talosaga e toe aumai i tua se tagi, ae faalavelave iai se isi taumafaiga e taofia ai le ave i tua, e pei ona talosaga le vaega faaupufai e puipuia aiā tatau a tagata e lē tatau i le faamasinoga ona talia le talosaga e ave i tua ona o tuua’iga sa aafia faiga faaālatua i le taumafaiga e ave i tua le tagi tau palota.
O le a talia le faai’uga e aumai ai se finagalo o le faamasinoga i māfua’aga o le teena o le ave i tua o lea tagi, aemaise o se finagalo o le faamasinoga i le aafia o tupe i le taumafaiga e faasolomuli le tagi tau palota mai Falealili 1, lea o le a amata su’esu’e molimau i le amataga o le vaiaso fou.
