O le tootoo lena na tu i le aiga i Toamua-uta na osofai e leoleo ma maua ai ‘aisa, o laau faasāina ma laau malosi ma ututau, faapea masini faatekonolosi e pei o telefoni ma laptops.
O le faaiuga lea a le faiganuu a alii ma faipule o le afioaga o Toamua i le Aso Gafua na autasi ai e faatulai ese le aiga ma ia ta le 4 o le Aso Lua o lenei vaiaso ua o ese.
O le mafuaaga o le faaiuga a le faiganuu a Toamua na faailoa e le tofa i le igoamatua Ale Vena Ale, o ia foi o le sui faipule o Faleata 4.
Le tofa Ale Vena Ale. O loo nofo taofia nei i le vaaiga a leoleo le toalima o tagata na molia i le mae’a o le osofaiga i le fale o le aiga ua faatulai ese.
O loo aofia ai ma lē e ana le fale o loo tu i se fanua umia saoloto ae o loo i totonu o eleele tau Toamua lea o loo iai le pule mamalu a alii ma faipule o lea afioaga.
O le Aso Gafua o le vaiaso asau le aso 22 o Me o le a tutulai ai i le faamasinoga alii e toatolu ma tamaitai e toalua ua molia ona o le osofaiga lea a leoleo i le Aso Toonai le aso 6 o Me.
