Ua tapena e le pulega o le Lakapi Samoa se taamilosaga lakapi ta’ito’afitu i le faamoemoe e faaauau pea ona atiina a’e le taaloga auā alo ma fanau lalovaoa a le atunuu, ae ia sami ai ma le atoaga o le 60 tausaga o le Tuto’atasi o Samoa.
O le faai’uga o le vaiaso nei e amata ai le taamilosaga muamua le round one, e saili ai ni ‘au e tausinio i le masina fou i le taamilosaga ta’ito’afitu faavaomalo i le taimi o faafiafia o le Fu’a. O le taamilosaga lea o le a auai ma ni ‘au mai Ausetalia, Niu Sila ma Fiti.
Ua faailoa e le Pulega o le Lakapi Samoa e 14 ‘au o le a saili mai le taailosaga muamua mo le taamilosaga lona lua e saili ai le siamupini.
Afai ae taunuu le fuafuaga i ni ‘au mai Ausetalia, o Niu Sila ma Fiti e auai, o lona uiga o le taimi muamua lea o le a tausinio ai ni aulakapi ta’ito’afitu mai fafo i se taamilosaga faavaomalo i le atunuu, i le tuanai o le lua tausaga ma masina e le’i toe malaga mai ni ‘au mai atunuu i fafo ona o tulaga sa tapunia ai tuaoi faavaomalo ona o le faama’i.
