Talu mai le masina o Novema na mae’a ai le taamilosaga o le Ipu o le lalolagi i le lakapi liki ma taunuu taumafaiga a le tatou aulakapi liki o le Toa Samoa i se tulaga maualuga e pei ona ausia le sailiga o le siamupini o le taamilosaga, sa molimauina ai le tele o oloa e pei o fu’a ma lavalava ua lolomi ai nisi o meatotino a le Toa Samoa e pei o faaupuga o le sivatau, ma saoasaoa le taulia i le lautele o tagata.

E fa’i o Samoa sa vaaia ai lea tulaga ae faapea foi i fafo atu o Samoa. Peitai o le Aso Lulu o le vaiaso nei na aumai ai i se tulaga faalauaitele e le ofisa loia o Aumua Law Firm se lapataiga faaletulafono mo pisinisi uma e taofia ai ia gaioiga, ma le faaupuga ua aafia le aiātatau o meatotino a le lakapi liki a le atunuu ma le Toa Samoa.

O lea lapataiga ua iai ma le fautuaga e tatau ia i latou uma e fia faaaogaina ia meatotino ona saili muamua se faatagaga mai le Lakapi Liki a le atunuu, ma ia tuuina atu foi se vaega o faamanuiaga tau tupe maua mai oloa o loo faatau atu e faaaoga ai ia meatotino poo intellectual properties.

O se tasi lea o faafitauli sa aafia ai foi le faaaogaina e nisi o le igoa o le aulakapi o le Manu Samoa i ni tausaga e tele ua tuanai ina ua maualuga foi le tulaga o le lakapi iuni a Samoa ma sa faatino ai foi se gaioiga faaletulafono e taofia ai, ma avanoa ai ona mulimulitaia aiaiga faaletulafono e faaaoga ai le igoa o le Manu Samoa.

O lea ua aliali mai foi i le aulakapi liki o le Toa Samoa. E lei manuia taumafaiga i se finagalo o le Peresetene o Lakapi Liki a le atunuu, ona e iai nisi o finagalo ua lagalagā ona o lenei mataupu.