Ua iai le suiga faaopoopo mo pasese femalagaa’i e tuua le malaevaalele faavaomalo i Aukilani, ma e talitonu o le a fesoasoani i le vave faagasolo o pasese ma faasao ai le taimi.
O le aso ananafi o lea na amata aloaia ai le suiga ua faataga ai nei ona tuu pea i totonu o ato o loo ave i luga o le vaalele poo carry-ons masini laptop faapea meatotino suavaia i taimi e siaki ai.
O masini nei komepiuta ua faaaogā e iloa ai totonu o ato, o ni faiga faatekonolosi ua fai mai ai le minisia o femalagaa’iga, Simeon Brown o se taimi o i luma o le a faaaogā ai i isi malaevaalele i totonu o Niu Sila ma o lea ua amata i le taimi nei ma faasolo atu i le masina o Tesema.
E lē gata o le a faafaigofie ai galuega a le vaega o tiute o loo suesueina ato, ae o le vave ai foi ona faagasolo o pasese e agai i faitotoa e ulufale ai i vaalele mo faigamalaga.
O lea faatoa amata aloaia i Aukilani ananafi, ae o isi uma pasese e tuua Niu Sila mai malaevaalele i Ueligitone ma Kalaiesetete o lea na amata faaaogā mai i le faaiuga o le tausaga talu ai.
O suiga ua omai ma masini komepiuta fou ua ta’ua, e lē o suia ai le faatapulaa e 100ml mo meatotino suavaia e mafai ona ave i luga o vaalele feoai faavaomalo.
Puna o Faamatalaga: Major security change for international travellers leaving Auckland (1news.co.nz)
