Ua lipotia le faavave atu o le au suesue i tulaga tau faamai ma togafitiga e mataitu nisi variants fou ua aliae mai nei I Saina ma le UK. Na lipotia atu ananafi e talafou le aliae o seisi ituaiga variant o le XE na muai iloa i le United Kingdom ma ua silia ma le 600 cases ua faamaonia mai ai.
O le aso ua aliae ai foi nisi lipoti pei ona faailoa I le 7News ua iai le popolega e ono sili atu le vave o le pepesi a le XE fua i nai uluai suesuega ua faia ma e faapea o le XE o se variant o loo aofia ai se vaega mai isi strains e lua ole omicron, le BA1 ma le BA 2.
O se lipoti mai le WHO ua iloa ai e foliga e 10 pasene e sili atu ai le vave ma faigofie ona pepesi o le XE nai lo le BA2 lea e aafia ai le tele o tagata ile taimi nei. O ia faamatalaga fai mai le WHO e manaomia ona toe faamaoniaina.
O lea lava foi lipoti ua faailoa ai le suesueina foi ma le tulituliloa e le UK Health Security Agency o nisi tuufaatasiga se lua ua faaigoa o le XD ma le XF lea e aofia ai vaega mai le Delta ma le BA 1 omicron. O le aso ua lipotia mai ai mai Shangahai ua iai seisi variant ua aliae i lea itu o Saina ma e le o maua se faamaoniga e tutusa ma isi variants e pei ona aliae I isi atunuu ma o loo faia nei iai suesuega.
E manatu nisi popoto faapitoa I mataupu faapenei e iai le manatu pe oo mai ia ituaiga variants fou I Ausetalia e ono le toe tau faia ni restrictions aemaise ona o le booster poo tui puipui faaopoopo e tatau ona sili atu ai le puipuia o le tagata mai le oo ise tulaga tigaina ona o le koviti 19.
