O loo suesueina vaalele e lua a le Qantas na semanu e feto’ai i le malaevaalele i Sini Ausetalia i le faaiuga o le masina talu ai.
O le tasi vaalele 737 a le Qantas o lea na sauni e tuuvaa ese e faamoemoe mo Brisbane, a o le tasi o lea na alu atu ma le pasese mai Niu Sila poo le vaa lea na agai ifo e tulaueleele.
I le tala a le 1News o lea na sau le faatonuga ua kilia le tuuvaa ese o le vaalele sa faamoemoe mo Brisbane mai le runway poo le auala o vaalele, peitai na semanu e feto’ai ai ma le vaalele o loo agai atu e tulaueleele.
Na lipotia na toe faatonu ai e lē o loo faatonutonuina le feoai o vaalele i le malaevaalele le vaalele na alu atu ma le faigamalaga mai Aukilani e ‘alo agai i le isi itu.
O le a iloilo uma fesootaiga aemaise le tele o faamaoniga i le mataupu lenei.
Fai mai le Qantas, e tusa ma le 170 pasese a vaa uma nei e lua ma o lea lava foi na fai mea faalogo pailate i faatonuga a lē o loo faatonutonuina ma faasoasoa le taunuu atu faapea le o ese mai o vaalele mai le malaevaalele.
