E 47 tausaga o le soifua o le tamaitai Pule o le faletelevise o le TV3 o Aotearoa Pesamino Mayer, na maua atu e nisi o ana uo i lona fale i Ululoloa i le taeao o le Aso Gafua, o lenei vaiaso ua maliu.
Ua faailoa mai e le Komesina o leoleo, falepuipui ma le ola toe fuata’ina le susuga Auapaau Logoitino Filipo, o loo faia nei suesuega i le mafuaaga o le maliu ae e le o aveesea ni masalomiaga o se gaioiga solitulafono e fesootai i le maliu.
Peitai e faatoa mautu ni mau mai suesuega o loo faia ma le faamoemoe o le taunuuga o lea sailiiliga, ma se lipoti i suesuega a fomai o le a mafai ona tuuina atu ai se faamatalaga i le pule o maliu poo le coroner mo se faaiuga mulimuli.
O lē ua maliu o se tasi o tagata faasalalau a le leitio o le Radio Polynesia i ana auaunaga i le gagana Peretania, ae o ni tausaga e lei mamao tele atu sa ia tauaveina ai le tulaga pule o le TV3 ina ua faatau ese lea auaunaga tau faasalalau ma umia e ni alii faipisinisi i le atunuu e aofia ai ma le pule o le Radio Polynesia.
Faaalia e le Komesina o leoleo e tele faamatalaga ua taunuu atu i leoleo, peitai o le taimi nei o loo saili ni tagata na fesootai iai lē ua maliu i lana telefoni feaveai i le faaiuga o le vaiaso na tea nei, e mafai ona tuliloa ni tagata sa feiloai mulimuli iai le tamaitai pule a o lei maliu.
