Ua faamauina le aga’i ai o se su’esu’ega a le Ofisa o Iloiloga o A’oa’oga, poo le Education Review Office (ERO) e faasino tonu lea i le maualuaga o le numera o fanau a’oga e lē o auai i a’oga.
O le lona lua ai nei o su’esu’ega ua faatautaia i totonu o le 3 tausaga.
Ma i le feiloa’iga a le ERO ma le Komiti faalepalemene mo A’oa’oga ma Tagata Faigaluega na folasia ai e le Faatonu o Iloiloga, Nick Pole, na aga’i sa latou su’esu’ega i le lata i le 4,000 o auaunaga mo a’oga amata ma a’oga i le atunuu i le tausaga 2023/2024.
I le su’esu’ega na molimauina ai le tele o vaega aupito i mata’ina i totonu o a’oga peitai na iai lava ni vaega ua o latou manatu e tatau ona faaleleia.
Ta’ua e Pole, o le faafitauli tele o loo maitauina o le maualalo o le numera o fanau e lē o auai atu i a’oga, lē lelei amio faaalia a fanau i totonu o potu a’oga, ma le pa’ū maualalo o polokalame fesoasoani mo fanau e iai aafiaga tumau o le soifua.
Faamauina i lipoti le ta’ua ai e le Sui Ofisa Sili o le ERO, le faia ai o sa latou su’esu’ega mo le lē auai atu o fanau i a’oga, ina ia maua foi se aotelega o faamaumauga e faatusatusa lea ma le lipoti o le tausaga 2022.
O loo ta’ua o le tasi o lu’itau o loo momoo ina ia vaaia se suiga o uiga ma amio a mātua.
Ma i le latou vaai o le tasi lea o vaega aupito i telē le sao i le lē auai ai o fanau i a’oga.
Faaalia e le ofisa, ua faaluaina le maualuga o le numera o fanau a’oga o loo aafia i lenei mataupu, e pei ona faamauina le oo atu i le 80,000 mai le 40,000 i totonu o le 4 i le 5 tausaga talu ai.
Ua faailoa e le Sui Ofisa Sili o le Ofisa o Iloiloga, o nisi o a’oga ua matua’i moomia lava le faia ai o ni polokalame faaleleia, ma i lona iloa e lē mafai ona faia na o latou e aunoa ma se fesoasoani.
Ma ua ia ta’ua o le tele o faafitauli e mai le faatino ai o a’oa’oga i totonu o potu a’oga ma le ta’ita’iina o fanau a’oga, ma le lē aga’i o fanau i a’oga.
Puna o Faamatalaga: https://www.rnz.co.nz/news/national/557626/school-attendance-to-be-scrutinised-by-education-review-office-again
