Ua faamatala e nisi o le aufaigaluega i le falemai i Kalaiesetete o le latou aufaigaluega ua taumafai e taunuu i le galuega toeitiiti itula atoa a o lei amatalia a latou sifi ona o le tau sailia o ni kapaka auā ua le saogalemu le savavali na o latou ia latou taavale i le taimi e mānava ai aemaise i le po.
O le lipoti a le Newshub ua faailoa ai nei finagalo, fai mai o se faafitauli faifaipea lea i le falemai ma ua iai tausi soifua ua osofaia e tagata ma faamatau foi a o savavali atu ia latou taavale pe a manava galuega.
O se isi galuega faaopoopo sa faia i le kapaka a le falemai ae o loo taofia i le taimi nei ae manatu nisi o le aufaigaluega pei ona folasia le mataupu, e le tatau ona iai le aufaigaluega i se tulaga lamatia faapea pe a agai ae i galuega.
Atonu e le fua tasi foi i Kalaiesetete le tulaga lea o le tau sailia o ni kapaka ae o le itu o loo popole ai o le saogalemu aemaise mo le itupa o tamaitai.
Fai mai le Te Whatu Ora Waitaha e lagona le faanoanoa i le tulaga e pei ona lipotia ae e le o iai se taimi faatulaga mo le faaiuina o le galuega mo le kapaka i le taimi nei ae o le a faatulaga nisi options mo le aufaigaluega aemaise o le ave o le faamuamua i tagata faigaluega i le po ma afai foi e avanoa sekulati i le taimi manava e mafai ona o latou savavali faatasi atu ma le tagata faigaluega i a latou taavale.
