O le faigata o auala mo fanau a le atunuu i Savaii ua lesitala mo a’oa’oga a le Iunivesite Aoao a Samoa i Salafai na mafua ai ona saili tupe le pulega o le Iunivesite a le atunuu, e ala i se leitiofoni ma mafai ona maua ai se tupe e silia i le 54 afe tālā Samoa e faatau ai se pasi mo fanau i Savaii.
Ua faailoa e le Iunivesite aoao a Samoa e 30,600 le tupe na aoina i le faamoemoe i le Aso Toonai na te’a nei lea e lē gata na faia i Upolu ae faapea foi Salafai, ae sa iai foi se komiti i Aukilani i Niu Sila na faatinoina lea sailiga seleni.
E 14 afe tupe Niu Sila na maua i Aotearoa faaopoopo iai ma le seleni na maua i Samoa nei ma o le a amata ai ona tapena le faatauina o se pasi. O le Pule o le Iunivesite aoao sa malaga atu i Niu Sila mo le faamaopoopoina o le faamoemoe faatasi ai ma nisi o sui sa lagolagoina le sailiga seleni, o le pule lagolago ma nisi o faauluuluga o le Iunivesite aoao sa faamaopoopona le tapenaga i Samoa.
