E tolu aso na faagasolo ai le taamilosaga o le Youth Pacific Cup i le malae i Magele i le faaiuga o le vaiaso ua mavae.
O le taamilosaga o loo faatāua ai fanau tamaitai i lalo o le 13, 14 ma le 15 tausaga le matutua, e aofia ai ‘au a Samoa ua faaigoaina o le Fetu Samoa, ‘au mai Cook Island, Niue, Tonga ma le NZ Maori.
Na faatumulia le malae i aso e tolu mai le Aso Faraile e oo atu I le Aso Sa i le tapuaiga a atunuu eseese ua agai atu e lagolago taumafaiga a le fanau.
Sa maualuga le taumafaiga sa iai ‘au a le Fetu Samoa mai ana ‘au e tolu, lea sa oo uma i luga o le sailiga o le saimupini ma ‘au a Maoli.
O le taumafaiga sa iai ‘au a le fanau e lei mafai ona faamanuiaina i le sailiga o le saimupini mo lenei tausaga ona e fai foi si malolosi o ‘au a Niu Sila.
Ae na saunoa le susuga ia Feleti Afoa o se tasi o tamalii o le atunuu o loo faauluulu iai lenei taamilosaga, e ese le tāua o lenei taamilosaga mo fanau laiti, ua mafai ai ona atinae ma fesoasoani i le taaloga lakapi o loo fiafia iai le fanau, ae le gata i lea pei a ta’u le lakapi liki e pei lava na o alii, ae o lea foi e vaavaai atu e toatele foi fanau tamaitai e fiafia i lea taaloga.
O le ‘au a le Fetu Samoa o se ‘au malosi tele mo fanau, ua lua ai nei o tausaga o ausia lava luga o le sailiga siamupini.
O le taamilosaga o se avanoa ua maua ai foi le taaalo faatasi o fanau mai atunuu eseese o le Pasefika ma maua ai e latou le fealofani.
O le masina fou lea ua fuafua e amata ai le taamilosaga mo alii i le matutua lava lenei mo fanau.
