A o toe faaopoopo ai le fuainumera o tagata ua maua i le Koviti, e lē o faigofie i faiaoga aemaise suega faaiu o le tausaga.
A o faasolo suega o le NCEA o lea e iai fanau o loo maua lava i le Koviti ae o loo o lava e sue.
Peitai, ona e lē o toe iai se faamalosia o le tatau ona faanofoesea seia vagana fautuaga o le tatau ona nofo i le fale, ua molimau mai ai le peresitene o le Auckland Secondary Principals Association, e faigata ona iloa tonu ona e lē o toe tutusa le malosi o taiala mo puipuiga i le taimi nei ma taimi a o aloaia tapu.
Pau le tulaga lelei o loo faaaogā pea e fanau ufi fofoga, peitai e lē o fanau uma o loo faaaogāina o loo maua i le Koviti.
Ua tautino ai e lē o mafai e faiaoga ona suesue fanau o loo o atu e tusa lava poo maua i auga, ma ua faamoemoe ai i aiga ma fanau aoga ina ia faia le faaiuga tonu pe a lagona ua lē malosi atoatoa e ala lea i le faaaogā o le faiga ua ta’ua o le derived grade process, peitai e lē agavaa ai pe afai o loo sue i suega sikolasipi.
Ua maua e tala fou e iai fanau aoga o lea ua agai i le derived grades process lea e toe faaaogā mai ai maka o suega o le ogatotonu o le tausaga faatasi ma le pepa ma’i e faamaonia ai o loo gasegase.
